Sími 441 6400

Fréttir

Jólafréttabréf

27.11.2014

Kæru foreldrar


Senn koma jólin og er undirbúningur þeirra hafinn hér í Grænatúni.  Við höldum að sjálfsögðu í okkar venjur og siði sem hafa skapast hér í gegnum árin.  Þriðjudaginn 25. nóvember fóru elstu börnin á Árbæjarsafn og skoðuðu hvernig haldið var upp á jólin í gamla daga. 


Rauður dagur
verður föstudaginn 28. nóvember en þá munum við mæta í rauðum fatnaði í skólann og borða rauðan mat :)  í söngstundinni okkar munum við kveikja á fyrsta kertinu okkar á aðventukransinum sem heitir Spádómskertið. 


Helgileikurinn okkar verður á sínum stað 4. og 5. desember.  Skessudeild verður í aðalhlutverki fimmtudaginn 4. desember og þá eru foreldrar á Skessudeild velkomnir.  Föstudaginn 5. desember verða börnin á Trölladeild í aðalhlutverkum og börnin á Dvergadeild fá að vera með og þá eru foreldar barna á þeim deildum velkomnir.  Sýningar hefjast báða dagana kl:9:30.  Eftir helgileikina er foreldrum boðið með börnum sínum inn á deildar í smá hressingu.  Vonandi  geta sem flestir foreldrar séð af tíma til að setjast niður og spjalla svolítið.


Sunnudaginn 7. desember
kl: 11-13 ætlar foreldrafélagið að vera með hið árlega jólaball í Snælandsskóla. Foreldrafélagið verður með heitt kakó á boðstólnum og svo koma allir foreldrar með eitthvað gott á sameiginlegt hlaðborð. 


Miðvikudaginn 17. desember
kemur Maxímús Músíkús í heimsókn til okkar í boði foreldrafélagsins kl:9:00

Föstudaginn 19. desember verður hátíðardagur hjá okkur þar sem hátíðarmorgunmatur og hátíðarhádegismatur verða bornir fram, hátíðarsöngstund, jólabíó og dansað í kringum jólatréið.  Það verður sannkölluð hátíðarstemning í húsinu.


Föstudaginn 2.janúar 2015 er skipulagsdagur í leikskólanum og hann því lokaður

Að lokum “dönsum við jólin út“ þriðjudaginn 6. janúar 2015.

Við munum að sjálfsögðu syngja mikið og lesa jólasögur og kvæði, auk þess sem við föndrum.  Allt verður þetta þó í hófi og við leggjum upp með rólegheit og sleppum öllu stressi. 

 

Við viljum ítreka að Stekkjastaur kemur til byggða fyrstur bræðra og fer skórinn út í glugga að kvöldi 11. desember og ekki fyrr

Við óskum ykkur öllum gleðilegrar hátíðar og þökkum fyrir árið sem er að líða og óskum ykkur velfarnaðar á nýju ári 2015.