Leikskólinn er fyrsta stig skólakerfisins og upphaf formlegrar menntunar barna. Leikskólaárin eru mikilvægur tími í lífi barns þar sem grunnur er lagður að námi, þroska og vellíðan. Í samstarfi við foreldra leitast leikskólinn við að skapa öllum börnum öruggt og uppbyggilegt umhverfi þar sem þau fá tækifæri til að njóta bernskunnar, eflast og dafna.

Áhersla er lögð á að byggja á styrkleikum, áhuga og hæfni hvers barns og líta á börnin sem virka og verðmæta þátttakendur í samfélagi leikskólans. Uppeldi, umönnun og menntun mynda órjúfanlega heild í öllu leikskólastarfi þar sem virðing, umhyggja og vellíðan barnsins eru höfð að leiðarljósi.

Markmið leikskólanáms er að styðja við alhliða þroska barna. Þar er horft til samspils helstu þroskaþátta, svo sem hreyfiþroska og líkamlegrar færni, tilfinningaþroska, vitsmunaþroska, félagsfærni, sköpunarkrafts, fegurðarskyns, siðferðisvitundar og lífsviðhorfa.

Barnið er ávallt í brennidepli í leikskólastarfinu og eru starfshættir mótaðir með hliðsjón af þroska, þörfum og áhugasviði hvers og eins. Nám í leikskóla er samþætt og fer fram í leik, samskiptum og daglegum athöfnum þar sem námssvið og reynsluheimur barnsins fléttast saman í heildstæða námsupplifun.